2012年4月23日

嘗味七泊﹝十九﹞白金温泉郷 森の旅亭 びえい

『森の旅亭 びえい』位於美瑛的白金温泉,是當地近年新開的溫泉旅館、亦是走〝比較〞高級路線的一間,全館共有 17室。其實從它開業至今,一直也想試試這間評價不錯的旅館,這次便順理成章與團友一同入住。在這個豪雪的冬季,令我覺得這裡稱為『雪の旅亭』比較貼切多一點。

步入旅館便是迎賓的 Lounge Area,雖然不甚大氣但 check-in 時的接待亦很周到;而且還有茶點、第一印象不錯。
清楚介紹旅館的設施、安頓行李、說明各客室的位置後,職員便引領大家到自己的房間去。由於旅館建設在山區、走廊通道會有高低起伏,不過旅館亦設有完全無障礙的別邸客室方便有需要的住客。
這次入住「離れ棟 露天風呂付」客室,每次出入便要經過長長的室外通道。假如是其他季節的話還可以,隆冬要在零下十多二十度之下出入,也不見得是甚麼好事。無論是朝夕二食、或者到大浴場,亦要經過這條雪迴廊。
入到房間發現大家的行李也給調亂了,也不明白剛才在 lobby 多次確認的作用何在,只是四組客人的行李也這麼大意。

可能受到空間所限,睡眠區竟然設在入口付近,除了通道外便只有細小的沙發作休息區。
浴室及沐浴間、再通往露天風呂。
但其實這個露天風呂在冬季也不怎麼露天,勉強只能算是展望風呂。
不過這個離れ棟客室也有可取之處,首先是環境清靜、而且望著客室的大窗亦令人猶如置身森林之中。
始終對這裡印象最深刻的,還是只有四周厚厚的白雪。

53 則留言:

lau2tang 說...

條通道無封密,着住浴衣出入咪要練短跑!?
我估夏天先黎住會靚啲。

jokelib 說...

咁佢都有供應雪褸,只係出入無咁方便、對腳凍僵.

跑又唔得,因為得拖鞋、雪地好易 P.K.

Niseko2000 說...

環境唔錯, 都係覺得條過道有少許麻煩, 帶住小朋友仲麻煩, 都係三余好d....

jokelib 說...

唔住 離れ棟 露天風呂付 咪得
>_<

Manatree 說...

就咁睇相,真心覺得好ok喎,至於條雪之迴廊我應該應付到,因為曾經去過(唔記得)某地,都遇過咁嘅情形,有機會呢間可以試吓~

jokelib 說...

好 okay? 你走去佢 website 睇埋價錢先下定論....

Niseko2000 說...

成家住露天風呂都唔平, 因3歲以上未夠6歲都收50%, 6歲以上收70%, that's why 三余最抵, 唔係收70%, 小朋友開始大, 睇怕要中咗Mark Six 先會再諗了....

jokelib 說...

咁我勸你都係去翻兜三余庵, 好過試依間.

Niseko2000 說...

其實年尾已經book 咗三余庵架啦, 驚冇房hahahaha

3J 家庭 說...

Niseko2000: 其實男仔去到10歲以上已經唔啱住風呂付客室,唔再方便一家大細一齊浸溫泉,我哋最後一次同阿仔住係佢10歲個年响小樽宏樂園,仲要係佢自己浸完,然後我同老公先一齊浸,唔係3個人一齊浸lu..所以宜家住溫泉酒店住一般和室已經得,不過可以搵到D有無料貨切嘅就最好,可以同老公一齊浸,上次住三余庵都只係我同老公兩個人去咋...

反且當小朋友再大D唔使住風呂付客室仲會慳D

Niseko2000 說...

3J 家庭, 多謝你的意見, 揀風呂付客室係 方便我自己浸咋(唔洗行出去), 哈哈仲未試過4個人一齊浸, 小朋友怕水熱....講開三余庵, 我其實係鍾意佢浴場個大木缸, 因房間少多數冇人浸, 可以包場....上次住三余庵因房間的風呂可以控制水溫, 所以大仔先浸....J少, 唔好意思離題添...

jokelib 說...

隨便傾~
(^_−)−☆

Manatree 說...

睇咗...,咁我未住過呢類旅館,咁我齋睇你d相真係覺得ok嘛...,而且我雖然話有機會試吓呢間,倒頭來咪又係住番d cheap嘢,咁先啱我身份...

3J 家庭 說...

Niseko2000: 估唔到原來係方便你自己浸,因為好多係為咗可以一家人一齊浸,我上次住三余庵都冇試過個浴場,下次有機會再去住要試試。

3J 家庭 說...

J少: 好奇想問點解床上個枕頭會放响門口個邊而唔係窗個邊,莫非係方便睇窗外景色?

其實我心裏好久前已經有個謎團,點解和室內的布團總是枕頭永遠係放在電視機那邊,那麼睡在上面便睇唔到電視,係咪傳統上一定係咁,我孤陋寡聞,唔知你可否話我知呢?

jokelib 說...

Manatree,
近期唔見你去, 又無見你買新玩具, 應該都夠彈藥去玩返轉"升呢初嘗豪食豪住". 以你的神功應該可以輕易 K.O. 各大旅館的夕食再加餐宵夜!

jokelib 說...

3J 家庭,

應該係, 因為上面有張相正正就係我照早瞓喺床度 hea 時影的.

我無咩留意電視的位置, 因為通常我地從來都唔開的. 日本人好少會瞓在床上睇電視架喎, 最多都係趴係個枕頭度.

枕頭擺位我又真係無留意喎, 我覺得佢地係無考慮電視的位置的, 只會配合室內的佈置多啲.

zason 2T 說...

呢間酒店被新假期介紹之後我都有考慮過去, 不過一來價錢有點不值(有小朋友), 二來好怕d路上上落落。 都係三余庵好! Niseko2000, 你年底又去嗎? 我計劃明年農曆年去, 不過一切只係想的階段! 我本來想呢個週末開工寫blog, 點知俾個賓賓打亂晒, 宜家我日日做賓賓又返工...但係我一定做得好過d賓賓, 好想快些逃離賓賓魔掌! J少, 唔好意思, d師奶仔係你地頭呻!

jokelib 說...

zason 2T,

嗰篇新假期垃圾報導得係得嗰位"世外神人救世主"先會信, 再得佢嗰招"兩間都未住過但係又要話比人知邊間好啲"的奇功, 先會廣傳開去.

想快些逃離賓賓魔掌, 但係你已經同我一樣, 跌入三余庵的魔掌!

zason 2T 說...

笑了! 也不算跌入三余庵魔掌, 係我哋自己跳落去啫! 好! 努力!

3J 家庭 說...

因為每次鋪完床後想瞓响度睇電視,個電視永遠都係响你頭頂。

可惜今次夏天北海道係3人行,唔可以住三余庵,不過夏天好似貴好多。

Niseko2000: 我今次帶廣會住北海道ホテル,見你住過幾好,夏天好貴3個人連朝食要23,400

zason 2T: 最近我都做咗2個幾月賓賓,不過阿仔已經大個,唔諗住再請,所以宜家完全逃離賓賓魔掌。

J少,我諗住過三余庵嘅人都會不知不覺跌入佢個魔掌,哈哈...

jokelib 說...

3J 家庭、

有機會的話我都好想試試北海道ホテル, 個早餐好吸引呢~~ 不過就算有機會去帯広、我又點可能再安排多一晚出來呢?

中咗三余庵的〝化綿掌〞,我已經失血過多,要返香港比個銀行戶口休癢生息。

Niseko2000 說...

3J 家庭: 唔講你都唔信, 一次夏天北海道都未去過, 北海道ホテル個早餐好正, 麵包無限量供應, 你呢個價錢都好過我7月book 咗一晚名古屋Yen24,000 冇早餐, 因為係Sat, 而且唔想老人家周圍行

zason 2T: 年尾去因redeem 咗2張大人機票, 仲要買2張小朋友的, 依加要努力save $$ 去住三余庵

J 少: "住過三余庵嘅人都會不知不覺跌入佢個魔掌", me too, that's why go again in Dec

Manatree 說...

呢期實行緊"宏觀調控",下個"日本"之旅應該重有段時間,總會有機會再去嘅,但唔敢包一定會係"升呢初嘗豪食豪住"團,可能係"實惠依舊勁食cheap住"團~XD

jokelib 說...

係"金裝王牌實惠喪食一日包 8餐超值團"

Manatree 說...

其實呢期睇遊記都好飽,真係發夢都見到"京櫻",所以止到吓渴~XD

jokelib 說...

所以我咪唔寫櫻花, 搵翻啲雪出黎比大家過吓冷河.

匿名 說...

樓主 , 咁講野就唔啱 , 人去旅行 , 你去旅行....寸嘴還寸嘴 , 新假期冇講過森の旅亭 , 唔好屈得就屈 , 搞錯第二本呀!

jokelib 說...

係我錯! 有位網友講起我就記錯咗, 因為我平時都唔睇香港旅遊雜誌, 搞亂咗 X假期 / Xmagaine.

多謝指正~

大隻Sam 說...

我又唔覺得樓主寸嘴...佢好厚道啦...俾我寫邊有咁好

zason 2T 說...

講對唔住應該係我! 一場誤會, 不過証明新假期係入屋過x Magazine啦,係咪! 唔好嬲! J少, 唔好意思!

jokelib 說...

首先錯在本人, 搞亂咗兩本不同的雜誌.

但係呢.....

就算唔講依篇的主角「森の旅亭」, 亦都無損我嗰句"嗰篇新假期垃圾報導"的言論. 因為本人對於『新假期』這本雜誌的感覺, 絕對無需要依靠「森の旅亭」而去行駛匿名人士所說的"屈得就屈"權利. 本人絕對有自由及在這個網絡日誌發表個人的觀感, 就正如閣下亦同樣有自由去批評本人的所有文章。

雖然本人還不明白匿名人士的"咁講野就唔啱 , 人去旅行 , 你去旅行"內裡隱藏的含意, 我不見得我去日本旅行會比其他人失格. 假如閣下是與『新假期』有任何關係或是個人的喜好情感, 實在不好意思.

本人也明白要一本周刊在香港這個市場運作實在不易, 時間及成本的限制過多。很多時資料錯誤, 亂寫一通的情況經常發生. 本人以往也曾經閱讀過一些『新假期』的所謂報導是用隔山打牛的方式寫出來, 要負責的"記者"單靠一些照片, 網上資料, 別人的遊記等等而幻想自己親身在當地一樣而去寫作, 可惜很多時連做編審的亦沒有到訪的經驗, 於是錯誤的資料及失實的報導便看在讀者眼裡。

假若近年的『新假期』已經作出改善, 本人實在有需要去再次閱讀, 繼而從新下定論.

lau2tang 說...

匿名人士,
就算係網主搞錯咗係邊一本雜誌寫過森の旅亭,只需留言指正便可以了!
「人去旅行 , 你去旅行....寸嘴還寸嘴 ,」,你呢句先係屈得就屈!你又唔識網主,相信你都唔係成日黎探網主ge讀者,你憑甚麼講呢一句呢?

大隻Sam 說...

lau2tang,香港咪就係最多呢啲挑人錯處就無限放大嘅人囉,叫佢做又唔識做,如那位匿名人仕有寫遊記就放條link俾大家欣賞欣賞~

lau2tang 說...

Sam,
都唔明點解啲人咁無禮貌!
三唔識七,走入人地屋企,招呼都唔打個,就一輪咀係度掃人,連名都唔留一個~

jokelib 說...

"挑人錯處就無限放大嘅人"咪就係我o羅!!

其實我都要多謝匿名人士的提點, 勿論他/她的語氣如何.

匿名 說...

我不是上面位師兄 , 講出這番話有大快人心之感 , 閣下可以說一本雜誌稱作垃圾報導 ,平時言論用寸嘴形用當之無愧, 我是 cd-rom , 又沒 blog , 留意閣下 blog , 源早年某 forum , 有網友問京都清水寺步行祗園時間 ,某版主答出好短時間 , 另一網友好心指正錯處 ,閣下夾埋 "兇" 好心網友 ,無話好說

jokelib 說...

我從來無講過亦無否認過我係大家所講的"寸嘴"一名, 我亦唔介意亦唔會去理會其他人點睇. 我又唔係出嚟做救世主為人民服務.

即使你用匿名留言, 我都唔會刪除的. 不過做人講得出就要認, 起碼都要有 guts 留 nickname.

我知道大把人頂我唔順, 香港旅遊 blog 有幾大?在背後批評我的人我夠知有唔少. 依個 blog 在好多人眼中都係一個垃圾 blog, 無咩價值.

意見接受, 態度照舊.

匿名 說...

你可以叫我 yannie , 唔好做太多遣背良心事

jokelib 說...

Yannie,

好, 多謝意見, 不過點解會覺得做咗"遣背良心事"呢?我無收錢寫 blog 喎.....

寫旅館/食店 comment 都係個人感覺, 各人口味唔同有落差好正常. 寫衰佢人地又唔會回水比我.....

匿名 說...

寫 blog 好多都係冇收錢 , 不止你一個 , 莫想擾亂視聽 , 閣下底一浸 , 面一浸 , 為求收視 , 早期吹然別湖有幾正 , 後期又吹占冠冰燈最靚之類 , 石井櫻花見過中最靚 , 京都/大阪平時比你貶幾年(你隨口講不為意) , 轉風見過櫻花又確不同
你期期未去前多多評論週處放 , 五十步笑一百步

yannie

匿名 說...

以下係我有位好姊妹叫我送給你 :

不外乎認叻、貪威、自誇之輩,自恃寫日遊blog比人早,強霸山頭,自封為王,搞小圈子 , 孤荒自賞大聯盟,做夜狼腳下的井蛙

係語氣唔好 , 講得好到位

YANNIE

jokelib 說...

吓?你要搞清楚, 依度唔係雜誌介紹, 唔係寫中性評論.

個人網誌 = 個人意見

每個人唔同階段有唔同喜好有咩出奇呢?你可以話我轉軚前言不對後語, 但係點同"遣背良心事"拉上關係?

寫 Blog 有人 like 亦會有人 hate, 你亦可以繼續嚟鬧, 無任歡迎.

匿名 說...

睇黎Y小姐都係J少的FANS喎, 咁孤荒自賞, 夜狼自大的網誌都跟得咁足.

Ee

匿名 說...

唔係 FANS , 週時吹至天下無敵 , SHOWOFF 少一陣就奇 , unlike blog , 勁非州和尚 , 良心剩多少

YANNIE

natnatchow 說...

Yannie 小姐
股票蝕鳥好多嗎??

匿名 說...

唔玩股票 , 唔好再九唔搭八 , 又走幾丁護法出來問 , 唔想再點醒這位人兄 , 到此為止
反正閙佢都冇用,佢網上整人多不勝數 , 唔當一回事

jokelib 說...

依位自稱 YANNIE 的 JaXXX 先生, 玩夠了.

你做咩自己走嚟對號入座做"世外神人救世主"呢?

做男人做到你咁, 要扮女人以為可以擾亂視線, 又話自己無 blog. 你駛唔駛我 post 你個 blog 出嚟?

你人格分裂我都聽得多, 估唔到你真係"分身"嚟撩交嗌, 完全無 point 喺度嘈. 閃閃縮縮夠膽講唔夠膽認.

你唔駛再扮喇~ 全世界都知道你係邊個喇!

你以為咁會影響我心情? 我聽日繼續寫 Tomamu, 多謝你提醒!

依度唔歡迎你, 你咪再嚟做 CD-ROM, 再唔係我 Block 你 IP.

natnatchow 說...

Yannie 小姐/先生
唔c咁勞氣,只係lee排見周街都係痴左線既人,睇你係咪佢地同類o者~~

Unknown 說...

我想知食飯餐廳有無獨立隔開,private space咁?

jokelib 說...

唔係個室,好似在走廊咁,但唔會見到其他住客。

Unknown 說...

泡湯越凍越有feel㗎,反而夏天去溫泉水太熱唔會泡太耐…

jokelib 說...

夜晚還好, 夏天我去過白金溫泉, 熱到無人浸落水.

Related Posts Plugin for WordPress, Blogger...