2012年4月17日

京桜初見﹝二﹞隨拍簡報


出發前已經知道今年的櫻花會比較遲開,還打算可以輕鬆一點放多些時間去吃好東西。啟程當日從網誌的留言才知道會與網友劉鄧乘同一班機往關西,於是我便在候機室嘗試相認這位素未謀面的朋友。到步後雖然大家行程各異,但不時也會以電郵交換最新情報。

不過最重要的仍然是每天緊隨「京都の桜情報」的 update,好讓我去臨時修改行程。而出發前花了不少時間去進修的達人網誌遊記亦大派用場,否則我這個京都新手亦不會如此順利。原先以為會錯過盛開的時間,結果是全部滿開。一如以往的經驗,賞櫻還是不能過份計算強求,一切交托給幸運之神才是王道。
在大阪城又遇到另外一位網友 3J家庭,有趣的是大家也是當天才臨時決定到大阪城的。除此之外,亦有其他多位朋友同時間到關西、只是沒有遇上罷了。

食運方面已經算不錯,除了中伏一間地雷店、及到現在依然摸不清參透不到的謎豬鍊孖星店外,其他的都感覺 C/P 值很不錯。而且亦認識到兩間很親民的肉店,兩間的牛肉也有很高的水準,最後一計下來,全程共吃了四餐牛牛。
另一樣是無論我們去到那裡,總是離不開北海道的美食。在事前完全不知道的情況下,一共在三個不同地方碰到三個不同的大北海道展。而且當中不乏我們喜愛的品牌,似乎要逃也逃不掉。
說到櫻花,賞櫻這麼多年、不錯是看過不少滿開的櫻名所如姫路城、錦帶橋等等。可是來到京都,根本上四周也是櫻花處處!你可以在同一天內、徒步在六七個景點看到不同型態不同種類的櫻花。山上、河邊、池邊、柳樹、公園、橋、寺、名勝等等,也難怪櫻花盛開的季節、四處也人頭湧湧。如此景色下,我亦破了紀錄在一天內瘋狂拍了兩千多張相片。

~完~


P.S. 以上全是用 iPhone 隨拍的、其他照片還未整理。

35 則留言:

Niseko2000 說...

iphone 影的都唔錯..
唔洗去北海道啦, 関西都有得食..
你好似成日係日本都遇到blog 友, 我一次都未試過...

jokelib 說...

吓?依啲小食用嚟打針止吓咳就得,點都要定期親身去覆診,敷藥留院觀察幾日先得架!

唔係呀,係極少會遇到呢,可能今年特別多人去啦.舊年想搵個香港人都難.

lau2tang 說...

今次我連百貨公司都無機會去行,錯過了北海道物產展添~
iphone都影得咁靚,真係服咗你。
十日食四餐牛,都唔係好過份啦。我本來個計劃係一個trip ko晒松阪、神戶同近江牛,點知都係完成唔到。

lau2tang 說...

p.s. 如果一早知道會撞到你,我就會走去出張b mobile。

jokelib 說...

lau2tang,
頭四天在大阪有時間嘛,咪周圍行. 落大雨嗰日入京都高島屋又見到, 以為自己眼花. 因為同一個展會14/4 在難波高島屋開始嘛, 我地本來都打算去買野返香港. 早知約你 14/4 食飯啦, 反正都無 plan.

今次覺得咩牛都係假, 部位及貨源最緊要. 平平地的普通黑毛和牛有時會好食過甚麼三大.

jokelib 說...

P.S. 全部用 iPhone 個原裝 camera App, 無用其他 App / 後期加工. 其實只要 focus 好, 等佢測光後再影就得.

P.P.S. 你又唔早啲 post 個行程, 我都係到機場睇你個 Blog 先知你飛 KIX.

3J 家庭 說...

嗰朝响大阪城突然有人响我背後叫我個名,擰轉面竟然係個從未見過面嘅人,幾surprise。

今年香港人返番日本喇,但我响四國就唔係見好多,可能四國暫時都係比較少人去。

講開牛,我今次响松山道後間酒店食咗今治牛,但份量太少,唔夠試味,仲諗住係食伊予牛。

jokelib 說...

3J 家庭、
我記得你個名而唔係叫"3J"都算神奇, 其實我第一眼係認到你的, 再見到其餘兩 J 就肯定無錯, 不過你地行得咁開我幾驚認錯.

我欣賞今治毛巾多啲, 哈哈~ 真係全日本最好架.

lau2tang 說...

唔做過笨,又點知道有「上駟對下駟」呢個道理。以後,我都要學吓,唔好計較係乜牛、物牛,總之,就要搵好夾抵ge和牛。
至於post行程,真係一言難盡!
其實家中發生了事,我一直擔心要將行程取消,
最後,都係要多謝我老公放行,我才可以欣賞美艷絕輪的櫻花。

jokelib 說...

有時名氣越大, 價錢越貴但質素又唔一定係最高. 好似我鄉下的白老牛, 網走牛, 十勝牛依啲平野有時煮得好, 仲好過三大.

咁要多謝大寶的支持了~

largeheadboy 說...

一次過滿足晒好多個願望呀,又櫻花又美食又北海道又京都~

jokelib 說...

只夠時間住一晚旅館, 但係結果都無時間去好好享受! 我下次要補返數!

lau2tang 說...

估你都係返鄉下多架嘞~

jokelib 說...

我都想呀~ 反正新年會去東北.

lau2tang 說...

又摷番你個東北冬祭個plan出黎呀?

joeyee 說...

伊予牛好味, 今治毛巾頂瓜瓜,
終於都有D野講倒兩咀.

jokelib 說...

哎呀你咁好記性? 2010 架喇喎.
非也, 只係因為得一個星期, 想去住幾間心儀旅館, 依家相信都無咩興趣睇冬祭了.

jokelib 說...

joeyee,

有冇大量入貨? 真係超好用呢~
伊予牛我就無食過了, 四國最懷念都係うどん。

lau2tang 說...

你唔記得我係大內總管咩?
做得大內總管第一個條件係記性一定要好,因為周不時會有人走黎考你、問記唔記得呢樣,嗰樣以前係點做開等等。不過,我的記性quota開始用完了~

jokelib 說...

即係 Office 的元老~
我雖然記性唔差, 但係出咗名應該記的就偏偏忘記, 唔應該記的就永遠記得....

lau2tang 說...

我係成個office最後入職ge一個,講元老的話,我勉強咗少少。
你呢種性格都幾好!但想更好的話,就應該連唔應該記的就永遠都唔記得......

3J 家庭 說...

原來今治毛巾咁正架...走寶添...
うどん我都有食呀...
新年去東北賞雪,正喎...
唉! 明年我要留港拜年

jokelib 說...

3J 家庭,

其實全國好多百貨公司都有賣今治毛巾.

你新年唔去o者, 暑假+聖誕去埋咪得.

3J 家庭 說...

係? 等我下次去日本留意吓..

暑假已經有著落,聖誕未必會,或者可能會早少少11月去睇紅葉,不過暫時都只係諗吓...

zason 2T 說...

我都返咗黎啦! 去京都3天有2天的天氣都唔太好,落大雨那天我哋仲痴到沿鴨川踏單車,差d冷襯小朋友。如果天氣好, 我本來都安排去高島屋, 錦市場行吓, 可能會見到你們添!去京都賞櫻行程真係好受天氣影響而改動, 所以都唔係太跟到原本計劃, 包括食方面, 都係見步行步。 就連影相都只係用iphone咁滯, 不過都唔差喎又方便,我唔係龍友所以好like呢個影相工具!

jokelib 說...

zason 2T,

我有去你 Yahoo Blog, 見你未有 update. 我地都係得 4日在京都, 落大雨咪就係去行錦市場+高島屋. 而且我地仲癲到係由京都駅, 一路行到東山!! 有經過鴨川架不過太大雨了.

反而食我地都跟足本來的 plan, 預約好晒一定照去啦.

iPhone 4S 都算唔錯架喇, 依篇都係靠佢.

zason 2T 說...

你應該無見到有家傻人落湯雞咁在鴨川,其實取車時只係微雨,而且約好了租車唔想失信更照去馬,點知一路行一路鬧自己,就連d途人嘅眼神都係”嘩!有無搞錯,兩個細路濕晒,點做阿媽架?” 我仲未回氣,星期日先整理個blog 啦!

jokelib 說...

zason 2T,

都係得一日星期三落大雨o者, 你緊係無 check 天氣, 講到明 12pm 開始落, 3-6pm 就大雨.

不過落咗場雨, 星期四全日都藍天, 我覺得已經係好好彩, 加上處處滿開, 有一日都好 lucky~

zason 2T 說...

check得唔仔細囉,只係見落雨無睇清楚詳細情況。 就係自己大意,教訓係第二天的神戶行程要取消追返京都的賞櫻景點!不過唔知點解,呢次旅程無咩心機check野???

jokelib 說...

zason 2T,

我在京都幾日都好留意櫻情報同埋天氣, 因為好難得會遇到滿開嘛. 誰不知好天嗰日就發生祇園事故, so sad.

不過無所謂啦, 你可以又搵機會再去過.

zason 2T 說...

祇園事故我們在現場呀! 不過係同d消防車一齊到, 當時仲諗只係架車撞燈柱做咩好似咁大陣象咁! 推測可能係怕架車爆炸/起火燒咗d屋。 大少見咁亂拉我哋行返轉頭走, 原來被人群遮住就係好多傷者, 好彩睇唔到唔係就會嚇親。 好快天空上已有起碼10架電視台直昇機, 我們企在白川數, 佢哋好似蜻蜓咁停在半空中, 可惜陽光太猛影唔到。 第二日先知原來咁大鑊, 心裡好唔舒服!

jokelib 說...

zason 2T,

嘩你仲危過我~ 我都離開咗了.

直到去平安神宮見到咁多直昇機, 嘈鬼住晒仲以為有咩天王出巡.... 到當晚睇電視先知呢.

zason 2T 說...

係囉, 如果早10分鐘到就..., 我哋係去完平安神宮去祗園喎! 真係平安咗!

由莉詩 說...

嵐山啲花開得好靚, 同我去個日差得遠呀 ! 你都食好多餐牛牛喎 !

jokelib 說...

由莉詩,

雖然只有一日藍天, 大部分時間都係陰天或者落雨. 但處處滿開的確靚好多.

代價咪係要住貴酒店o羅.... 無得住心儀的 カンラ.

Related Posts Plugin for WordPress, Blogger...